Санаи 22 декабри соли 2021 дар шаҳри Дубайи Амороти Муттаҳидаи Араб дар ҳошияи Рӯзи миллии Тоҷикистон дар намоишгоҳи EXPO – 2020 Форуми соҳибкорию сармоягузории Тоҷикистону Амороти Муттаҳидаи Араб баргузор гардид.

Дар кори Форум бо сухани муқаддимотӣ раиси Кумитаи давлатии сармоягузорӣ ва идораи амволи давлатӣ Қодирзода Саъдӣ Сангинмурод ва котиби генералии Федератсияи палатаҳои савдо ва саноати Амороти Муттаҳидаи Араб Ҳумайд бин Салим баромад намуданд.

Инчунин дар Форуми мазкур намояндагони Дастгоҳи иҷроияи Президенти Ҷумҳурии Тоҷикистон, Сафорати Ҷумҳурии Тоҷикистон дар Амороти Муттаҳидаи Араб, роҳбарияти вазоратҳои молия, саноат ва технологияҳои нав, дигар ашхоси расмӣ ва намояндагони бахши хусусии ду давлат дар маҷмӯъ 140 нафар иштирокчӣ ширкат варзиданд.

Зимни баргузории Форум имкониятҳо, соҳаҳо ва лоҳаҳои сармоягузории афзалиятноки Ҷумҳурии Тоҷикистон муаррифӣ карда шуда, аз доираҳои сармоягузории Амороти Муттаҳидаи Араб барои иштирок дар лоиҳаҳои муштарак даъват ба амал оварда шуд.

Ҳамзамон дар доираи Форуми мазкур байни доираҳои соҳибкорию сармоягузории ду давлат як қатор санадҳои дуҷонибаи ҳамкорӣ ба имзо расонида шуд.

Манбаъ: аз сомонаи investcom.tj